Elm adamları ayrı qitələrdəki iki siçanın beynini bir-birilə birləşdirib. Ayrı yerlərdə olan siçanlar beyinlərindəki elektrodlar vasitəsilə bir-birlərini idarə edə bilib. Braziliyanın bir tədqiqat institutundakı siçan elektron rabitə ilə ABŞ-da yerləşən bir laboratoriyadakı digər siçana impuls göndərərək onu idarə edib və su götürməsini təmin edib. Tədqiqatçılardan Miqel Nikolesis iki beyin arasında funksional rabitə quraraq ikibeyinli “superbeyin” əldə etdiklərini deyib. Nikolesis bu kəşfin iflic xəstələrinin müalicəsinə kömək edəcəyinə diqqət çəkib.

Miqel Nikolesis və tədqiqat qrupu, əvvəlcə,siçanları su götürmək məqsədilə işıq yandıqda lingə basmaq üçün təlimləndirib. Sonra siçanların hərəkətlə əlaqədar məlumatı idarə edən beyin bölgəsinə incə elektrodlar yerləşdirilib və bir-birləri ilə əlaqə qurmaları təmin edilib. Birinci siçan sınaqdan uğurla keçdikdə, yəni düzgün lingə basdıqda beyni elektrik impulsu göndərib. Bu impuls eyni anda digər siçanın beyninə göndərilib. İkinci siçan su götürmək üçün digər siçanın göndərdiyi impulslar sayəsində heç bir əyani vasitə olmadan 70% düzgün seçimlə lazımi lingi tapıb.

Nikolesis ikinci siçanın düşüncə və ya görüntülər olmadan, impulslar sayəsində birinci siçanın verdiyi qərara əsasən lingi tapdığını bildirib. Prosesin ikitərəfli işlədiyini bildirən elm adamları birinci siçanın səhv etdikdə daha güclü, aydın impulslar göndərdiyini qeyd edib. Elm adamları bundan sonra 2014-cü ildə Braziliya Dünya Kubokunda beldən aşağı hissəsi iflic olan bir xəstənin bənzər metodla süni ayaq vasitəsilə topa ilk zərbəni vurmasını təmin etməyi hədəflədiklərini bildirib. Tədqiqat “Nature Scientific Reports” jurnalında dərc olunub.